تقرير مصور -- زيارة ابو سيف و عبدالعزيز النويصر للأحساء.

[سعد العفالق]

السلام عليكم و رحمة الله .

سعد العفالق يحييكم من الأحساء المحروسة و يقدم لكم تقرير مصور عن زيارة عبدالله سيف و عبدالعزيز النويصر يوم الخميس الماضي.

الزيارة بدأت بوصول الشباب صباح الخميس , وصلوا و ارتاحوا شوي و انتظرنا لين جا باسل المجنا.
و اتفقنا نطلع على سيارته بما انه أعرف مني بالأماكن المناسبة للتصوير. بس شكله تحسف بعد الغبار اللي دخل سيارته و المطبات اللي اكلناها.

أول محطة لنا كانت وحدة من قنوات الصرف تتميز بوجود شلالات صغيرة كل 200 متر.
و هذا باسل يقول للشباب عن المكان.




و خذوا الشباب كم صورة في المكان هذا و انتقلنا الى جهة كانت فيها شوية نخيل ميتة و سيارة قديمة موقفينها على خشبة و استلموها الشباب تصوير , و قبل لا نغير المكان شفنا قناة ري صغيرة و نزلوا الشباب يصورونها.
بس للأسف ما توفقت في تصويرها.
و هذا عبدالعزيز يطالع صوره و عبدالله يبي يصورنا بالفش آي.



و بعدها طلعنا و رحنا عين الخدود , و جانا هناك سامر البقشي.
و لقينا ناس يسبحون في العين و ما عندهم أي مشكلة انهم يتصورون.
و لما خلصنا تصوير قال لنا واحد منهم: "قولوا للجريدة ترى العين يبيلها تنظيف"
و هذي صورة الشباب و هم صافين جنب بعض على الدرج و يصورون اللي يسبح. (الفوكس من جد مضروب)




و طلعنا بعدها لخزان صويدرة اللي اول مرة اجيه.
و انبسطوا الشباب على المياه و هي تتوزع في القنوات. و خذوا لها كم صورة.




و بعدها قلنا خلاااااص ما نقدر نكمل , الساعة جات 11:30 و الكاميرات بدت تفهي من الحرارة.
و رجعنا البيت نرتاح و نتغدى , و طلعنا الساعة 3:30 على جبل القارة.
و رحنا في البداية للجهة الخلفية و خذينا كم صورة على السريع.



و بعدها رحنا للمدخل الرئيسي للجبل. بس قلنا نطلع فوق اول شي و بعدين ندخل الجبل.
و طلعنا فوق و و فيه اللي تعب و وقف في نص الطريق و اللي وصل فوق و وقف بين صخرتين كل رجل على صخة و جلس يصور.
و انا يوم طلعت فوق تذكرت شي مهم , تذكرت اني اخاف من المرتفعات .
المهم و جا وقت النزول , و احنا نمشي مترين و نزلق متر.
و هذي صورة لعبدالعزيز و هو توه زالق.



و جلست اتشمت في عبدالعزيز و على زلقته , و ما مرت دقيقة الا و انا زالق ذيك الزلقة المحترمة.
و الشباب مبسوطييييييييين .
معليه اوريكم .



و تزلنا عشان ندخل الجبل و نصور داخله , و من اول ما قربنا من المدخل هب علينا هوا باااااااااارد. سبحان الله.
و دخلنا و جينا بنصور بس زحمة , كل شوي مرت علينا عائلة اما داخلة ولا طالعة , و المكان ضيق و احنا مسوين زحمة.
بس طلعنا بكم صورة مهيب شينة , اوريكم بعدين .

و طلعنا برا و شفنا جماعة يعرفهم سامر , يقول انهم يقربون لأخونا فقيرووه اللي في البحرين.
و قعد سامر يصورهم و عطى الكاميرا لباسل و صورهم.



و طلعنا من جبل القارة مستعجلين , نبي نرجع لنفس القناة اللي رحنا لها الصباح عشان نصور الشلالات بتعريض طويل.
و وصلنا متأخرين شوي , بس برضو الوقت ينفع و ممكن نطلع منه بشي حلو.
و كل واحد مسك له زاوية و ترايبود و جلس يصور.
شوي الا باسل تحمس و نزل للقناة و نزل الترايبود و الكاميرا , و شافه سامر و تحمس و سوى مثله.



و ابو سيف شاف الوضع كذا قام سوى مثلهم. و انا و عبدالعزيز برا الماي ناشفين و مرتاحين و نحمد ربنا على نعمة العقل .

و خلصنا من هالمكان و رجعنا البيت , و الشباب توكلوا على الله و رجعوا الجبيل.
و كنت ناوي اقابلهم ثاني يوم في طلعة بحر بس للأسف الطلعة الغيت لعدم توفر العدد الكافي من الركاب .
بس خيرها بغيرها.

و الشباب الله يجزاهم خير شرفونا و شرفوا الحسا بزيارتهم.
وسعوا صدورنا و خلونا نتحرك و نطلع و نصور.
مشكورين يا شباب على الزيارة , و لازم ضروري ترجعون و نكمل معكم اللي ما سويناه في الطلعة هذي.

ايه و نسيت اقول لكم.
اللي عنده صورة من الطلعة ينطلها هنا.
سلام.

[علـي الخليفــــة]

ادام الله المحبة بينكم .. اسلوب شيق ولطيف

تحيتي لك

[عبدالملك بن شايع]

ما شاء الله تبارك الرحمن

اشوف ( عطلات العفالق ) تقدم عروض طيبة في الصيف الحار

دائماً التقارب والإجتماع والفائدة المتبادلة والأخوة هي ميزة هذا التجمع الطيب

الله يعطيكم العافية

[Fahad Al-Sakran]

المشاركة الأصلية كتبت بواسطة عبدالملك بن شايع

ما شاء الله تبارك الرحمن

اشوف ( عطلات العفالق ) تقدم عروض طيبة في الصيف الحار

دائماً التقارب والإجتماع والفائدة المتبادلة والأخوة هي ميزة هذا التجمع الطيب

الله يعطيكم العافية

الله يسلمك يا سعد

أحجز لي مقعد نهاية الأسبوع الجاي
عندي رحلة عمل كم يوم هناك وبإذن الله وناوي لي على كم صورة.
بعدها بروح للبحرين ومن ثم للإمارات كم يوم.

[عبدالله سيف]

ياعيني عليك ياسعد على التقرير المشوق

وانا من عندي انزل لكم الصور الي التقطتها عدستي

اولا

صوره للشباب داخل سيارة الأخ باسل الي صارت ددتسن من كثر ماطبينا في حفر ومطاب

لاكن للأسف ماطلع باسل بالصوره


من يمين عبدالعزيز النويصر وفي اليسار البرمائي سعد العفالق



الأخ باسل وهو قرفان من نفسه معا الحر كانت درجة الحرارة تصل الى الخمسينيات



عبد العزيز النويصر وهو يصور



اثناء طلوعنا فوق جبل القارة



من فوق جبل القارة



لاحظو التشققات من اعلى جبل القارة



اخذت صوره لباسل وهو يصور لأعلى وسامر البقشي يساعده



اثناء دخولنا جبل القارة والشباب مبسوطين بالبراد داخل القارة وللعلم الحرارة برى حوالي 50 درجه مؤويه



ومن يروح الأحساء ومايصور نخيلها



اثناء تصوير الشباب في مجرى الماء وقبل نزولي



احد مجاري المياة من العين


اتمنى ان الصور تنال على أعجابكم

وننتظر باقي صور الشباب

[MTR]

تجمع رهيب للشباب يوم من الايام بسوي مداهمه لكم وبحضر احد تجمعاتكم الأحسائيه

[عبدالعزيز البقشي]

ما شاءالله عليكم يا شباب هابين ريح
نورتوا الحسا بهالرحلة الطيبة
الله يجمعكم على كل خير ان شاءالله

تحياتي لكم

[A Z Z A M]

ماشاء الله .. نتمنى أننا معكم ..


: )

[فيصل الدريويش]

رحله موفقه شباب

امنيتي ان اكون معكم يوما ما

وواضح ان الرحلة جميلة وممتعه والليل ابتسامة سعد اخر صورة

[مالك الغصاب]

رحلة موفقة يا شباب ..

كم أتمنى زيارة المنطقة الشرقية قريباً ..

كل التوفيق يا أصدقاء الضوء

احترامي،،